Vortónleikar í Fríkirkjunni, laugardaginn 10. maí kl. 16Kór Kvennaskólans

"Tíminn líður, trúðu mér..." Ótrúlegt en satt: Það er tæp vika í vortónleikana okkar! Þeir verða að venju í okkar kæru Fríkirkju og hefjast að þessu sinni kl. 16, laugardaginn 10. maí. Við erum búnar að bjóða Kór Iðnskólans að vera gestir okkar og hlökkum til að vinna enn og aftur með þeim. Til upprifjunar: Þau voru með okkur í spunaverkefninu hans Gunnars Ben og svo aftur á kórmótinu 19. apríl. Stjórnandi þeirra er Kristín Þóra Haraldsdóttir. Andri Björn Róbertsson ætlar að syngja einsöng með okkur í einu lagi og svo verður bæði píanó- og gítarundirleikur. Ólöf Jónsdóttir leikur á píanó í nokkrum lögum og Þórður Jóhannesson, betur þekktur sem eðlisfræðikennari í Kvennaskólanum, ætlar að grípa í gítarinn í einu lagi. Dagskráin spannar bæði íslensk og erlend lög af ýmsu tagi, t.d. þjóðlög, lög úr kvikmyndinni "Sound of Music", perluna "Ég bið að heilsa", madrigala... Það stefnir allt í fjölbreytta tónleika.

Kóramótið í FlensborgarskólanumKór Kvennaskólans

Loksins gefst tími til að segja aðeins frá kóramótinu sem fram fór laugardaginn 19. apríl síðastliðinn í Flensborgarskólanum í Hafnarfirði. Við vorum flestar mættar fyrir kl. 10 um morguninn til að hjálpa til við undirbúninginn og svo hófst mótið sjálft stuttu síðar með leikfimi og upphitun. Á mótið mættu Kór Flensborgarskólans, Kór MR, Kór FSu, Kór Iðnskólans, Kór Borgarholtsskóla og svo við. Við höfum ekki staðfestar tölur í höndunum en reiknast til að við höfum verið á milli 160 og 170 söngvarar. 

Framhaldsskólakórar syngja í Flensborgarskóla, laugardaginn 19. aprílKór Kvennaskólans

Nú er spennan í hámarki: langþráð kóramót verður á laugardaginn. Í því taka þátt nokkrir framhaldsskólakórar og er gert ráð fyrir að þátttakendur verði vel á annað hundraðið. Dagskrá hefur verið skipulögð, sameiginleg lög ákveðin... já, þetta er allt að ganga upp. 

Spunnið af lífi og sál!Kór Kvennaskólans

Þá er spunaverkefnið okkar vel af staðið og var það ótrúlega lærdómsríkt og skemmtilegt í alla staði fyrir þá sem tóku þátt. Við æfðum af krafti frá kl. 12.00 í dag í Sölvhóli, tónleikasal LHÍ við Sölvhólsgötu. Frá okkur í Kvennó tóku þátt í lokasprettinum sex stelpur (auk kórstjóra) og er algjör synd hversu margar voru uppteknar því þær misstu af miklu. Við fínpússuðum bæði verkin sem við sömdum og sungum og voru einhverjir þættir sameiginlega verksins frumsamdir í dag... Þetta mátti því ekki tæpara standa því tíminn leið hratt.


Rétt fyrir klukkan fjögur tóku tónleikagestir að streyma að og var mætingin á tónleikana framar björtustu vonum þar sem fyrirvari og þar með auglýsingatími var mjög stuttur. Tryggir foreldrar, fyrrverandi kórfélagar og fleiri vinir kóranna áttu með okkur góða stund og hlýddu á tónverkin þrjú. Viðtökur voru góðar enda er óhætt að segja að allt hafi smollið saman og lögin verið skemmtilega ólík og frjó, öllum höfundum og Gunnari Ben til mikils sóma.




Við í Kór Kvennaskólans þökkum Gunnari Ben hjartanlega fyrir frábæra leiðsögn í verkefninu. Við erum heldur betur reynslunni ríkari eftir þessa vinnutörn. Ekki má gleyma að þakka Ingibjörgu skólameistara fyrir komuna á tónleikana. Okkur grunar að hún hafi verið eini skólameistarinn sem mætti og þótti okkur óskaplega vænt um að sjá hana í áhorfendahópnum.Við þökkum líka hinum kórunum sem tóku þátt. Það var svo gaman að hitta aðra söngelska framhaldsskólanema og vinna með þeim.
Sem minnir okkur á það: Senn líður að kóramóti nokkurra framhaldsskólakóra sem haldið verður í Flensborgarskólanum eftir 2 vikur eða laugardaginn 19. apríl. Þar verður örugglega glatt á hjalla og mikið sungið.
10. maí höldum við vortónleikana okkar í Fríkirkjunni, að ógleymdum söng á útskrift í Hallgrímskirkju, 23. maí... Já, það verður sko meira en nóg að gera hjá okkur á næstu vikum!

Kórspuni með Gunnari BenKór Kvennaskólans

Nú hefur verið aldeilis nóg að gera hjá kórnum. Við höfum verið á kafi í spunaverkefni undir stjórn hins frábæra og fjölhæfa tónlistarmanns og kórstjóra Gunnars Ben sem við þekkjum af góðu síðan við sungum með Árnesingakórnum hans í fyrra. Fleiri framhaldsskólakórar taka þátt í verkefninu með okkur. Vinnan hefur farið þannig fram að hver hópur hefur hitt Gunnar tvisvar á æfingum til að gera stutt verk saman. Við enduðum með að vinna okkar verk með félögum úr Kór Iðnskólans og Verslunarskólans. Kór Menntaskólans við Sund gerði sjálfstætt verk með Gunnari á sínum æfingum. Í gær, föstudaginn 4. apríl hittust allir hóparnir og byrjuðu á sameiginlegu verki. Þeirri vinnu verður haldið áfram í dag og endum við á að flytja verkin þrjú kl 16.00 í Sölvhóli, tónleikasal Listaháskóla Íslands, Sölvhólsgötu 13 (bakhús).
Þetta hefur verið mjög skemmtilegt og skapandi enda tónskáldin mörg og allir kórfélagar hafa jafnan atkvæðisrétt. Við semjum bæði lög og texta og hugmyndirnar vantar sko ekki! Við hvetjum því alla áhugasama til að koma á Sölvhólsgötuna og heyra flutninginn sem verður einstakur því þetta verður ekki endurtekið, amk. ekki verk alls hópsins... Aðgangur er ókeypis og allir hjartanlega velkomnir!

Tilraun til myndainnsetningarKór Kvennaskólans

Smá lífsmark...
Þar sem við eigum enn í ítrekuðum erfiðleikum með að setja inn myndir á myndasíður bloggsins, okkur til mikillar mæðu, ætlum við til sárabóta að setja inn nokkrar myndir frá því í desember hér beint í frétt og gá hvort það gangi betur.










Verðum við ekki að segja að þetta sé betra en ekkert á meðan við bíðum eftir myndamálin komist í lag?
Skrifum annars fréttir af vorönninni mjög bráðlega því nú er mikið á seyði...

Gleðilegt ár!Kór Kvennaskólans

Gleðilegt ár kæru vinir! Nú er kórinn búinn að hvíla sig yfir jólin og aftur farinn að æfa af krafti á nýju og spennandi ári. Dagskrá vorannarinnar er í mótun og munum við segja frá henni þegar hún skýrist. 

Langþráðar fréttir af haustönninniKór Kvennaskólans

Heldur hefur verið lítið um fréttir hér á síðunni okkar á þessu hausti en það þýðir ekki að kórinn hafi setið aðgerðalaus, þvert á móti hefur verið nóg að gera.
Kórstarfið hófst í byrjun september með raddprufum og komu nokkrir nýir félagar í hópinn. Kórinn telur nú um 20 félaga og hefur kórstarfið gengið mjög vel, mæting verið góð á æfingar og fínn andi í hópnum.
Um mánaðarmótin október-nóvember fór kórinn í æfingabúðir í Skálholt þar sem æft var krafti og skemmt sér eins og vera ber frá föstudegi til sunnudags. Ferðin tókst í alla staði mjög vel. Við náðum m.a. að æfa okkur svolítið í Skálholtskirkju sem er alltaf jafn stórkostleg upplifun enda kirkjan eitt besta tónleikahús landsins. Nokkrar tóku líka þátt í bænastund og messu.
Dagur íslenskrar tungu, 16. nóvember, fór varla fram hjá nokkrum manni og að venju gekk kórinn um skólann og söng íslensk lög fyrir nemendur og starfsfólk. Í þetta sinn slóst Andri Björn Róbertsson í hópinn og heillaði alla með glæsilegum einsöng í laginu "Ég bið að heilsa..." en lögin sem voru sungin voru flest við ljóð afmælisbarnsins, Jónasar Hallgrímssonar.
Á síðasta kennsludegi haustannar söng kórinn nokkur jólalög í mötuneyti nemenda og sendi þannig nemendur í sönnu jólaskapi inn í prófafarganið.
Hápunktur annarinnar í kórstarfinu voru aðventutónleikar kórsins sem haldnir voru í Fríkirkjunni sunnudaginn 2. desember kl. 20. Tónleikarnir voru vel sóttir og hlýlegar viðtökur gesta yljuðu kórnum um hjartarætur. Sungin voru lög af ýmsu tagi, aðallega trúarleg lög og auðvitað jólalög! Kórinn þakkar þeim sem komu kærlega fyrir að hafa gefið sér tíma til að skreppa í Fríkirkjuna á þessu fagra kvöldi.

Nú um helgina mun kórinn syngja jólalög í anddyri verslunarinnar IKEA, nánar tiltekið sunnudaginn 16. desember frá k l. 13-14. Svo mun hópurinn halda í verslunina Debenhams í Smáralind og syngja þar aðeins síðar um daginn. Fimmtudagskvöldið 20. desember heldur kórinn aftur í IKEA og syngur þar frá kl. 20-21. Velunnarar kórsins eru hvattir til að nýta sér þessi tækifæri til að koma að hlusta á okkur um leið og þeir sinna jólainnkaupum!

Við setjum inn myndir frá haustönninni við fyrsta tækifæri en bendum á að fullt af myndum frá Madrid bættust við þær sem fyrir voru í október.

Allt að gerastKór Kvennaskólans

Búið er að setja inn annál um kórinn þar sem hægt er að lesa um hvað við vorum að gera á seinasta ári og fljótlega munu koma fleiri myndir frá Madríd ásamt mynd af kórnum í núverandi mynd.

Nú erum við byrjaðar að æfa á fullu og undirbúa okkur fyrir það sem mun koma á þessari önn en við ætlum m.a. að syngja í messu í Fríkirkjunni og á degi íslenskrar tungu.
En fyrst ætlum við kynnast betur og fara í æfingabúðir í Skálholt í nóvember.

Kórinn að byrjaKór Kvennaskólans

Kveðja frá Margréti Helgu kórstjóra:
"Nú er haustið gengið í garð og skólastarf byrjað. Þá fer kórinn aftur að hugsa sér til hreyfings eftir sumardvala frá því að komið var heim úr frábærri Madridarferð. Eitt af því sem mun gerast á næstunni er að fleiri myndir úr ferðinni munu bætast hér í myndasafnið. Af nógu er að taka, það er eitt sem víst er!

Kórkynningar hafa farið fram í skólanum undanfarna daga og margir sýnt því áhuga að bætast í hópinn. Raddprufur fyrir nýliða fara fram frá kl. 16.30 mánudaginn 3. september í kórstofunni okkar (stofu N4). Þriðjudaginn 4. september verður svo fyrsta æfing vetrarins. Æfingar verða á svipuðum tíma og undanfarin ár eða kl. 16.30-18.30 á þriðjudögum og fimmtudögum. Að vísu verður frí fimmtudaginn 6. september vegna busadags og -balls. Dagskrá annarinnar er í mótun og verður kynnt betur þegar nær dregur atburðum.
Hlakka til að sjá nýja og gamla félaga á þriðjudaginn! :-)
-MHH